Ngjarja fatkeqe ndodhi pas një periudhe të ngarkuar emocionalisht për familjen, kur në mëngjesin e së njëjtës ditë u zhvilluan ceremonitë mortore për nënën e Ilirit. Vetëm disa orë pas varrimit, ai u rrëzua papritur për shkak të një krize kardiake dhe u dërgua menjëherë në spital. Për tre ditë me radhë, ndodhej në gjendje kome, ndërsa familjarët e tij qëndruan pranë në një pritje të dhimbshme që përfundoi me ndarjen e tij nga jeta.

Ilir Shqina ishte një emër i njohur në shërbimin diplomatik shqiptar. Ai ka mbajtur disa pozicione në Ministrinë e Punëve të Jashtme dhe në përfaqësitë diplomatike të Shqipërisë jashtë vendit. Krahas karrierës së tij si diplomat, ai ishte edhe një pedagog i respektuar, i angazhuar në formimin e brezit të ri të profesionistëve.

Për publikun e gjerë, Shqina njihej gjithashtu si ish-bashkëshorti i Grida Dumës, politikane, pedagoge dhe gazetare. Ata kanë qenë të martuar për më shumë se dy dekada dhe janë prindër të një djali. Megjithëse rrugët e tyre janë ndarë zyrtarisht prej disa vitesh, marrëdhënia mes tyre ka qenë e qetë dhe korrekte, sidomos për hir të rolit prindëror që ndanin.

Lajmin për ndarjen nga jeta të Ilir Shqinës e dha fillimisht politikania Majlinda Bregu, e cila përmes një postimi të ndjerë në rrjetet sociale, shprehu dhimbjen për humbjen e një kolegu të respektuar dhe mikut të saj të vjetër. Ajo e kujtoi si një njeri të heshtur, të mençur, korrekt dhe me përkushtim të thellë ndaj detyrës publike. Edhe figura të tjera nga fusha e diplomacisë, akademisë dhe politikës kanë shprehur ngushëllimet e tyre për ndarjen e parakohshme të Ilirit.

Ndarja e Ilir Shqinës nga jeta, vetëm pak orë pas humbjes së nënës, përbën një tragjedi të dyfishtë për familjen dhe të afërmit. Një dhimbje e rëndë, që përforcohet jo vetëm nga humbja njerëzore, por edhe nga konteksti i ngjarjes – një infarkt i papritur, në kulmin e një stuhie emocionale që la pas vetes një boshllëk të madh.

Ceremonia mortore për Ilir Shqinën u mbajt në Tiranë, me pjesëmarrjen e familjarëve, miqve të afërt dhe kolegëve që i dhanë lamtumirën e fundit një figure të respektuar në jetën publike shqiptare.

Në emër të stafit dhe lexuesve tone”, u shprehim ngushëllimet më të sinqerta familjes, të afërmve dhe gjithë atyre që patën fatin ta njohin nga afër Ilir Shqinën.