Ngushtica e Hormuzit do të rihapet vetëm kur dëmet nga lufta e imponuar të kompensohen plotësisht…
Një zyrtar i lartë iranian i është përgjigjur ultimatumit të fundit të Presidentit të SHBA-së, Donald Trump, duke thënë se Ngushtica e Hormuzit, një rrugë kyçe për transportin e naftës, do të “rihapet” vetëm kur dëmet financiare nga lufta të “kompensohen plotësisht”.
Më herët gjatë ditës së sotme, Trump lëshoi një mesazh të mbushur me fjalë fyese drejtuar Iranit, duke paralajmëruar për veprime të ashpra ushtarake nëse Teherani dështon të arrijë një marrëveshje ose të rihapë rrugën ujore jetësore.
Në përgjigje, Mehdi Tabatabaei, zëvendës për komunikimet në zyrën e presidentit iranian Masoud Pezeshkian, tha se udhëheqësi amerikan është drejtuar me fjalë të pista nga dëshpërimi dhe tërbimi i pastër. Ai e akuzoi Trumpin për nxitjen e një “lufte të përgjithshme në rajon”.
“Ngushtica e Hormuzit do të rihapet vetëm kur, sipas një regjimi të ri ligjor, dëmet nga lufta e imponuar të kompensohen plotësisht nga një pjesë e të ardhurave nga taksat e tranzitit”, postoi Tabatabaei në X.
Zyrtarët iranianë kanë thënë më parë se do të vazhdojnë të vendosin tarifa për kalimin e sigurt të disa anijeve cisternë nëpër ngushticë, një propozim që është përballur me reagime të ashpra nga qeveritë dhe ekspertët e industrisë së transportit detar.
Ndërkohë, misioni i Iranit në Kombet e Bashkuara tha se mesazhi i Trump ishte një kërcënim i hapur për të shkatërruar infrastrukturën thelbësore për mbijetesën e civilëve në Iran.
“Bashkësia ndërkombëtare dhe të gjitha shtetet kanë detyrime ligjore për të parandaluar akte të tilla të tmerrshme të krimeve të luftës. Ata duhet të veprojnë tani. Nesër është tepër vonë”, tha misioni në një deklaratë.
Kujtojmë se ditën e djeshme Trump i dha Iranit një ultimatum të ashpër 48-orësh, duke paralajmëruar se nëse Teherani nuk rihap plotësisht Ngushticën e Hoprmuzit ose nuk arrin një marrëveshje paqeje brenda këtij afati, Shtetet e Bashkuara do të godasin infrastrukturën kritike iraniane, duke përfshirë centralet elektrike më të mëdha.