Ditët e fundit, një sekuencë nga emisioni “Politiko” me moderator Kushtrim Sadiku është bërë virale në rrjetet sociale, duke nxitur reagime të shumta dhe spekulime mbi gjendjen e tij gjatë transmetimit.
Pamjet ku moderatori shfaqej me vështirësi në artikulim u interpretuan nga shumë përdorues si shenjë e konsumimit të alkoolit gjatë emisionit, i cili trajtonte një temë të ndjeshme si Beteja e Koshares, duke e bërë situatën edhe më të debatueshme në publik.
Pas disa ditësh heshtje, Sadiku ka reaguar përmes një statusi në Facebook, ku kërkon ndjesë për situatën e krijuar, por mohon kategorikisht akuzat për dehje.
Sipas tij, gjendja fizike është shkaktuar nga probleme shëndetësore me stomakun, përfshirë terapinë për këtë dhe trajtime dentare, të cilat i kanë sjellë lodhje dhe vështirësi në të folur.
Ai pranoi gjithashtu se vendimi për të mos e anuluar emisionin ka qenë i gabuar, ndonëse është motivuar nga dëshira për të mos munguar në ekran pas një karriere të gjatë pa ndërprerje.
Megjithatë, postimi i tij ka hapur debat të ri në rrjetet sociale, ku një pjesë e përdoruesve kanë vënë në dyshim vetë autenticitetin e deklaratës, duke e konsideruar atë të diskutueshme dhe të pabesueshme.
Sadiku ka theksuar ndërkohë respektin e tij për temën e emisionit dhe ka njoftuar se do të vijojë aktivitetin e tij në ekran.