Ministri i Jashtëm turk, Hakan Fidan ka deklaruar se ka nevojë të ruhet momentumi në procesin e planit të paqes në Gaza, duke kërkuar rritje të presionit mbi Izraelin për të parandaluar shkeljet e vazhdueshme.
“Përpjekjet që palët do të bëjnë për këtë çështje janë të rëndësishme. Në veçanti, presioni mbi ngurrimin e Izraelit dhe parandalimi i shkeljeve të tij janë jashtëzakonisht të rëndësishme për të kaluar në fazën e dytë në Gaza. Sinqerisht, ne po i paralajmërojmë si bashkësinë ndërkombëtare, ndërmjetësit dhe të gjithë aktorët në Bordin e Paqes që të marrin masat e nevojshme”, tha Fidan në një konferencë të përbashkët për shtyp me Ministren e Jashtme austriake Beate Meinl-Reisinger.
Ai shtoi se kushtet në Gaza dhe në Bregun Perëndimor të pushtuar, të cilat i përshkroi si një zgjatim të ekspansionizmit izraelit në rajon, nuk i shërbejnë interesave të Lindjes së Mesme apo të Europës.
“Situata rrezikon të gjenerojë paqëndrueshmëri të mëtejshme, sfida të sigurisë energjetike dhe flukse të parregullta të migracionit”, tha Fidan.
Ministri shtoi gjithashtu se një milion njerëz janë zhvendosur në Liban për shkak të sulmeve dhe pushtimit izraelit, duke paralajmëruar se zgjerimi i mëtejshëm mund të shkaktojë migrim të detyruar shtesë. Për këtë arsye, shtoi ai, Izraeli duhet të vihet nën një presion më të kualifikuar ndërkombëtar për këtë çështje.