Një zyrtar iranian ka paralajmëruar se vendi mund të kalojë në pasurimin e uraniumit deri në nivelin e nevojshëm për armë bërthamore nëse Shtetet e Bashkuara ndërmarrin sulme të reja ndaj tij.
Ebrahim Rezaei, zëdhënës i Bllokut për Sigurinë Kombëtare dhe Politikën e Jashtme në parlamentin iranian, deklaroi se një nga opsionet që po shqyrtohet është pasurimi i uraniumit deri në 90%. “Një nga opsionet e Iranit në rast të një sulmi tjetër mund të jetë pasurimi deri në 90%. Ne do ta shqyrtojmë atë në parlament,” tha Rezaei.Sipas standardeve ndërkombëtare, centralet bërthamore funksionojnë me uranium të pasuruar në 3-5%, ndërsa nivelet rreth 90% konsiderohen të përshtatshme për përdorim ushtarak.
Uraniumi natyror përmban izotope të ndryshme, por vetëm U-235 përdoret në reaksione zinxhirore bërthamore. Procesi i pasurimit rrit përqendrimin e këtij izotopi.
Deklaratat vijnë në një moment tensionesh të larta mes Teheranit dhe Uashingtonit, ndërsa presidenti amerikan Donald Trump ka mbrojtur veprimet ushtarake kundër Iranit duke argumentuar se vendi nuk duhet të pajiset me armë bërthamore.
Sipas raportimeve të mediave amerikane, administrata e Trump po shqyrton mundësinë e sulmeve të reja ndaj Iranit për të forcuar pozicionin e tij në negociata, megjithëse kërcënime të tilla janë bërë edhe më herët pa një vendim përfundimtar.
Tensionet mes dy vendeve mbeten të larta, ndërsa çdo përshkallëzim i mëtejshëm do të kishte pasoja serioze për stabilitetin rajonal dhe sigurinë globale.