Më shumë se 1.700 persona mbeten në karantinë në bordin e anijes turistike “Ambition”, e ankoruar në grykëderdhjen e Girondës pranë Bordosë, në jugperëndim të Francës, pas vdekjes së një pasagjeri dhe shfaqjes së rasteve të dyshuara me gastroenterit.
Sipas një njoftimi të përbashkët të prefekturës së Girondës dhe autoriteteve rajonale shëndetësore franceze, në anije ndodhen 1.233 pasagjerë, kryesisht britanikë dhe irlandezë, si dhe 514 anëtarë të ekuipazhit.
Autoritetet thanë se rreth 50 pasagjerë kanë shfaqur simptoma të përputhshme me një infeksion akut gastrointestinal, çka aktivizoi protokollet shëndetësore të parashikuara për raste të tilla.
Si masë parandaluese, autoritetet lokale pezulluan përkohësisht zbarkimin e pasagjerëve dhe ekuipazhit, ndërsa kufizuan kontaktet e anijes me portin. Në të njëjtën kohë, ekipe të specializuara shëndetësore vijojnë kontrollet dhe ndërhyrjet në bord.
Autoritetet franceze theksuan se nuk ekziston asnjë lidhje mes këtij rasti dhe rasteve të fundit me hantavirus të raportuara në anijen “MV Hondius” në Oqeanin Atlantik.
Prefektura e Girondës njoftoi se analizat laboratorike janë ende në zhvillim për të identifikuar agjentin patogjen që shkaktoi simptomat dhe për të vlerësuar rrezikun e përhapjes.
Testet e para përjashtuan praninë e norovirusit, i cili konsiderohet një nga shkaqet më të zakonshme të gastroenteritit në kroçera. Megjithatë, autoritetet shëndetësore nuk përjashtojnë mundësinë e helmimit ushqimor.
Sipas informacioneve paraprake, kulmi i simptomave, kryesisht të vjella dhe diarre, u regjistrua më 11 maj, kur anija ndodhej në Brest të Francës.