SHBA-të dhe Izraeli po intensifikojnë përgatitjet për një valë të re sulmesh ndaj Iranit, vetëm pak javë pas armëpushimit të arritur muajin e kaluar. Sipas “The New York Times”, të dy vendet synojnë të jenë gati për veprim ushtarak që javën e ardhshme.
Bëhet me dije se në tavolinë ndodhen disa skenarë operacionalë. Njëri prej tyre parashikon dërgimin e forcave në terren për të siguruar dhe nxjerrë materialin bërthamor iranian të fshehur nën rrënoja. Megjithatë, zyrtarë ushtarakë kanë paralajmëruar se një operacion i tillë do të kërkonte mijëra trupa mbështetëse dhe një rrethim të gjerë sigurie.
Një tjetër opsion që po shqyrtohet nga Uashingtoni përfshin bombardime më intensive ndaj objektivave ushtarake dhe infrastrukturës strategjike iraniane.
Ndërkohë, mediat izraelite raportojnë se Tel Avivi po përgatitet për rifillimin e afërt të luftës me Iranin. Kanali 12 i Izraelit deklaroi se strukturat ushtarake janë vënë në gatishmëri për një përshkallëzim të mundshëm të konfliktit.
Presidenti amerikan Donald Trump konfirmoi gjithashtu tensionet me Teheranin, duke zbuluar se kishte refuzuar propozimin më të fundit të paqes nga Irani.
“Nëse nuk më pëlqen fjalia e parë, thjesht e hedh poshtë… ishte një fjali e papranueshme”, tha ai para gazetarëve.