Një Airbus A320 që ka qenë në përdorim të ‘Air Albania’ ka përfunduar në Rusi, në një tjetër rast që lidhet me mënyrat se si Moska po siguron avionë pavarësisht sanksioneve perëndimore ndaj industrisë së aviacionit, shkruan Blick.
Sektori i aviacionit civil rus vazhdon të përballet me vështirësi të mëdha pas sanksioneve të vendosura nga SHBA dhe BE, të cilat kanë kufizuar furnizimin me pjesë këmbimi, mirëmbajtje dhe avionë të rinj nga prodhuesit Airbus dhe Boeing.
Megjithatë, sipas raportimeve të platformës së aviacionit Aero Telegraph, avionë të ndryshëm vazhdojnë të gjejnë rrugë alternative për të përfunduar në Rusi.
Rasti më i fundit lidhet me një Airbus A320 që deri në prill ishte i parkuar në Stamboll dhe më parë kishte fluturuar për Etihad Airways dhe ‘Air Albania’. Më pas, avioni u zhvendos përmes Omanit dhe përfundoi në Moskë, ku është regjistruar tashmë nën shenja ruse.
Sipas të dhënave të publikuara, avioni është prodhuar në Toulouse në vitin 2011 dhe ka ndryshuar disa herë pronarë dhe regjistrime ndër vite.
Pas shërbimit fillestar për Etihad Airways, ai u transferua te një kompani leasing-u dhe më pas u përdor nga ‘Air Albania’ për një periudhë të caktuar.
Pas kthimit nga operimet në Europë, avioni u mbajt për një kohë në Stamboll, para se të rishfaqej në Rusi. Aktualisht, ai operohet nga një kompani ruse e specializuar në fluturime charter dhe avionë biznesi.