Trump shtoi se edhe pse sulmi i planifikuar për ditën e nesërme u anulua, ka urdhëruar Sekretarin e Luftës që të jenë të përgatitur…
Presidenti amerikan, Donald Trump ka shtyrë sërish sulmin e planifikuar ndaj Iranit, një veprim tashmë i kthyer në zakon. Por kësaj radhe Trump shprehet se kjo shtyrje ka ardhur si rezultat i kërkesë së ardhur nga aleatët në Lindjen e Mesme dhe për shkak se aktualisht po zhvillohen negociata serioze shumë të përshtatshme për SHBA-në.
Me anë të një reagimi në rrjetin social “TruthSocial”, Trump theksoi se do të arrihet një marrëveshje e mirë për SHBA-në dhe të gjitha vendet në Lindjen e Mesme, me kushtin themelor që Irani të mos ketë asnjë armë bërthamore.
Trump nuk harroi të përsëriste kërcënimin për sulme, teksa shtoi se edhe pse sulmi i planifikuar për ditën e nesërme u anulua, ka urdhëruar Sekretarin e Luftës që të jenë të përgatitur për të vazhduar me një sulm të plotë dhe në shkallë të gjerë ndaj Iranit, gjithmonë nëse marrëveshja dështon.
“Emiri i Katarit, Tamim bin Hamad Al Thani, Princi i Kurorës i Arabisë Saudite, Mohammed bin Salman Al Saud, dhe Presidenti i Emirateve të Bashkuara Arabe, Mohamed bin Zayed Al Nahyan, më kanë kërkuar të shtyj sulmin tonë të planifikuar ushtarak ndaj Republikës Islamike të Iranit, i cili ishte planifikuar për nesër, për shkak se tani po zhvillohen negociata serioze dhe se, sipas mendimit të tyre, si Udhëheqës të Mëdhenj dhe Aleatë, do të arrihet një Marrëveshje, e cila do të jetë shumë e pranueshme për Shtetet e Bashkuara të Amerikës, si dhe për të gjitha vendet në Lindjen e Mesme dhe më gjerë.
Kjo Marrëveshje do të përfshijë, e rëndësishme, asnjë armë bërthamore për Iranin! Bazuar në respektin tim për Udhëheqësit e lartpërmendur, kam udhëzuar Sekretarin e Luftës, Pete Hegseth, Kryetarin e Shtabit të Përbashkët të Ushtrisë, Gjeneral Daniel Caine, dhe Ushtrinë e Shteteve të Bashkuara, që NUK do ta bëjmë sulmin e planifikuar ndaj Iranit nesër, por i kam udhëzuar më tej ata që të jenë të përgatitur për të vazhduar me një sulm të plotë dhe në shkallë të gjerë ndaj Iranit, në një moment njoftimi, në rast se nuk arrihet një Marrëveshje e pranueshme. Faleminderit për vëmendjen tuaj ndaj kësaj çështjeje”, shkroi Trump.