Një trajtim i ri kundër kancerit ka sjellë rezultate premtuese në një studim ndërkombëtar, duke ngjallur optimizëm te mjekët dhe studiuesit për potencialin e tij në luftën kundër sëmundjes.
Terapia eksperimentale, e njohur si “amivantamab”, u testua te pacientë me forma të avancuara të kancerit që nuk kishin reaguar ndaj trajtimeve të mëparshme, përfshirë kimioterapinë dhe imunoterapinë.
Sipas rezultateve të studimit, të zhvilluar në 11 vende të ndryshme, tumoret u tkurrën ose u zhdukën te më shumë se një e treta e pjesëmarrësve. Nga 102 pacientët e përfshirë me kancer të kokës dhe qafës, 43 treguan përmirësim të dukshëm, ndërsa në 15 raste mjekët konstatuan zhdukjen e plotë të tumoreve.
Ekspertët e përfshirë në studim e cilësojnë reagimin e pacientëve si të jashtëzakonshëm, veçanërisht duke pasur parasysh se bëhet fjalë për raste ku sëmundja kishte treguar rezistencë ndaj terapive ekzistuese.
Rezultatet pritet të prezantohen në konferencën vjetore të Shoqërisë Amerikane të Onkologjisë Klinike në Çikago, një nga aktivitetet më të rëndësishme në fushën e kërkimeve mbi kancerin.
Studiuesit raportojnë se trajtimi ka dhënë rezultate inkurajuese edhe te pacientët me kancer të mushkërive, ndërsa aktualisht po zhvillohen dhjetëra prova klinike për të vlerësuar efektivitetin e tij në lloje të tjera tumoresh, përfshirë kancerin kolorektal, të trurit dhe të stomakut.
Megjithatë, ekspertët theksojnë se nevojiten studime të mëtejshme për të konfirmuar sigurinë dhe efektivitetin afatgjatë të këtij trajtimi para përdorimit të gjerë te pacientët.