Humbjet e Partisë Republikane në zgjedhjet e mesit të mandatit në SHBA kanë nxjerrë në pah tensione të reja në marrëdhëniet mes Uashingtonit dhe Tel Avivit, teksa palët po distancohen nga përgjegjësia për pasojat politike dhe ekonomike të luftës në Iran.

Ndërsa zëvendëspresidenti amerikan JD Vance e ka cilësuar konfliktin si shkakun kryesor të humbjes së republikanëve, duke përmendur edhe pakënaqësinë e votuesve ndaj marrëdhënieve me Izraelin, ambasadori izraelit në OKB, Danny Danon, ka theksuar se vendimi për të sulmuar Iranin ishte tërësisht amerikan.

Këto qëndrime sinjalizojnë shfaqjen e përplasjeve politike mes dy aleatëve pas rezultatit zgjedhor, ndërsa secila palë përpiqet të shmangë përgjegjësinë për kostot e konfliktit.

Ambasadori i Izraelit në Kombet e Bashkuara, Danny Danon, ka hedhur poshtë sugjerimet se Izraeli ishte përgjegjës për vendimin e Shteteve të Bashkuara për të nisur sulme ushtarake kundër Iranit, duke këmbëngulur se operacioni ishte vendim i Uashingtonit dhe se Izraeli vetëm e kishte mbështetur atë.

Në një intervistë me agjencinë izraelite të lajmeve i24NEWS, Danon argumentoi se Izraeli nuk duhet të mbahet përgjegjës për rritjen e çmimeve të naftës dhe pasojat ekonomike të konfliktit. Ai pohoi se vendimi për të sulmuar Iranin i takon tërësisht administratës amerikane.

“Vendimi për të sulmuar Iranin ishte vendim i Shteteve të Bashkuara. Nuk ishte vendimi ynë. Ne mbështetëm përpjekjet e SHBA-së dhe mendojmë se ishte vendimi i duhur. Është shumë e lehtë të fajësosh Izraelin për gjithçka. Por nuk është kështu”, tha ai.

Izraeli refuzon përgjegjësinë, ndërsa marrëdhëniet SHBA-Izrael përballen me pikëpyetje . Komentet e Danon vijnë mes pyetjeve në rritje mbi të ardhmen e marrëdhënieve midis Uashingtonit dhe Tel Avivit pas performancës së dobët të Partisë Republikane në zgjedhjet e mesit të mandatit të vitit 2026. Konflikti i Iranit është shfaqur si një pikë debati politik në SHBA, me shqetësime mbi kostot e tij ekonomike dhe implikimet për marrëdhëniet me Izraelin.

I pyetur nëse Presidenti i SHBA-së, Donald Trump, mund të arrinte një marrëveshje me Teheranin që nuk do të adresonte shqetësimet e sigurisë së Izraelit, Danon e bëri të qartë se Izraeli nuk do të bënte kompromis për mbrojtjen e tij.

“Ne gjithmonë do të bëjmë çfarëdo që është e nevojshme për të mbrojtur veten”, tha ai.

I dërguari izraelit shprehu gjithashtu besimin se Shtetet e Bashkuara do të vazhdojnë të përdorin të drejtën e vetos në Kombet e Bashkuara për të mbrojtur Izraelin, pavarësisht presionit politik në rritje brenda Kongresit. JD Vance i lidh humbjet e republikanëve në zgjedhjet e mesit të mandatit me luftën e Iranit.

Komentet e Danon pasuan vërejtjet e zëvendëspresidentit të SHBA-së JD Vance, i cili lidhi luftën në Iran me pengesën zgjedhore të Partisë Republikane. Në një postim në X, Vance tha se konflikti kishte larguar votuesit që kishin mbështetur kandidaturën Trump-Vance në zgjedhjet presidenciale të vitit 2024.

Duke cituar gjetjet e një anketuesi, Vance tha se votuesit donin që lufta të mbaronte, vëmendje më të madhe ndaj kostos në rritje të jetesës dhe një ndryshim në marrëdhënien e Uashingtonit me Izraelin.

“Arsyeja pse humbëm është lufta. Vetë presidenti e tha këtë mbrëmë”, shkroi Vance.

Ai argumentoi gjithashtu se çdo vlerësim i humbjes së republikanëve dhe drejtimit politik të partisë duhet të pranojë pasojat e konfliktit.

“Por të gjithë e dinë pse humbëm. Dhe çdo bisedë e sinqertë rreth asaj se ku do të shkojmë nga këtu duhet të fillojë aty”, shtoi Vance.