Ngjarja ndodhi pranë zonës së Nizandës, në komunën Asunción Ixtaltepec, ku sipas të dhënave zyrtare në tren udhëtonin rreth 250 pasagjerë. Guvernatori i Oaxacës, Salomón Jara Cruz, njoftoi për tragjedinë përmes një deklarate në rrjetin social X, duke shprehur trishtimin e thellë për humbjet njerëzore.

Autoritetet shtetërore bëjnë me dije se 139 persona ndodhen jashtë rrezikut për jetën, ndërsa 36 nga të plagosurit po marrin trajtim mjekësor të specializuar në spitale të zonës. Qeveria e Oaxacës ka shprehur ngushëllime për familjarët e viktimave dhe ka siguruar se do të ofrohet ndihmë e plotë për të prekurit nga aksidenti.

Treni Interoqeanik, i cili lidh Gjirin e Meksikës me Oqeanin Paqësor, është një projekt kyç për transportin e pasagjerëve dhe mallrave në jug të vendit. Ndërkohë, autoritetet kanë nisur hetime për të përcaktuar shkaqet e daljes nga shinat dhe përgjegjësitë e mundshme për këtë tragjedi.