Sipas hetimeve, Gerti Bushati është personi që ka vendosur lëndën eksplozive në panelin elektrik të pallatit në lagjen “Manush Alimani”, shpërthim nga i cili humbi jetën Ymeri më 29 dhjetor 2025. Për këtë “shërbim”,

Bushati dyshohet se ka marrë një pagesë prej 1 mijë eurosh, shumë e siguruar nga tre të rinjtë e tjerë: Ergys Ibrahimi, Edison Hasaj dhe Gjergji Zefi, të cilët dyshohet se e kanë ndarë paraprakisht shumën mes tyre, nga 250 euro secili.

Një burim pranë hetimeve bën me dije se paratë i janë dorëzuar Bushatit dy ditë para shpërthimit dhe janë gjetur e sekuestruar nga policia. Megjithatë, ende po hetohet nëse ka pasur apo jo premtime për pagesa shtesë.

Pas vendosjes së tritolit, Bushati është larguar nga vendngjarja duke hequr kominoshen dhe kapuçin, të cilat i ka hedhur pranë lumit. Ai është identifikuar përmes kamerave të sigurisë, vëzhguar dhe më pas arrestuar. Nga hetimet rezulton se shpërthimi në distancë është aktivizuar nga Edison Hasaj.

Policia dyshon se të katër të rinjtë kanë vepruar thjesht për përfitim financiar, pasi nuk kanë pasur asnjë konflikt të drejtpërdrejtë me viktimën. Provat më të forta kundër tyre janë siguruar nga zbërthimi i celularëve dhe përgjimet e realizuara në qelitë e izolimit, ndërsa motivi i saktë i krimit mbetet ende i paqartë.

Katër të arrestuarit pritet të dalin të hënën përpara Gjykatës së Shkodrës për t’u njohur me masën e sigurisë.