Gjatë një konference të mbajtur në Doha, Khaled Mashaal, deklaroi se Hamasi nuk do të ndryshojë qëndrimin e tij përballë presionit të ushtruar nga Shtetet e Bashkuara dhe Izraeli. Sipas tij, kërkesat për çarmatimin e Hamasit dhe kriminalizimin e veprimtarisë së tij përbëjnë një vijë të kuqe që organizata nuk e pranon.

“Kriminalizimi i rezistencës, i armëve të saj dhe i atyre që e kryen atë është diçka që nuk mund ta pranojmë”, u shpreh ai, duke e paraqitur rezistencën e armatosur si element të pandashëm të identitetit dhe strategjisë së Hamasit.

Në fjalën e tij, Mashaal iu drejtua drejtpërdrejt Bordit të Paqes, duke kërkuar miratimin e një “qasje të ekuilibruar” ndaj Gazës.

Ai theksoi se rindërtimi i territorit dhe lejimi i ndihmës humanitare nuk duhet të kushtëzohen me heqjen dorë nga armët apo me imponimin e një administrimi të huaj.

Sipas Mashaal, çdo përpjekje për të vendosur struktura të huaja qeverisëse në Gaza do të përbënte një formë sundimi të papranueshëm.

“Hamasi nuk do të pranojë sundimin e huaj”, deklaroi ai, duke sinjalizuar se organizata do të kundërshtojë çdo skenar që parashikon ndërhyrje politike apo ushtarake nga jashtë.