Një ngjarje e rëndë është zbuluar në lindje të Francës, ku një djalë 9-vjeçar u gjet i mbyllur në një furgon për më shumë se një vit nga babai i tij.
Fëmija u zbulua pas një denoncimi nga fqinjët, të cilët kishin dëgjuar zëra që vinin nga automjeti i parkuar. Kur policia ndërhyri, e gjeti në një gjendje shumë të rënduar.
Ai ishte i dobësuar, i kequshqyer dhe nuk mund të ecte, pasi kishte kaluar një kohë të gjatë pa lëvizje. Sipas asaj që ka treguar vetë fëmija, ai nuk lejohej të dilte nga furgoni në asnjë moment.
Ai detyrohej të përdorte shishe dhe qese për nevojat personale dhe nuk ishte larë prej një kohe shumë të gjatë. Brenda automjetit kishte mbeturina dhe kushte të rënda higjienike.
Hetimet tregojnë se babai, 43 vjeç, shkonte disa herë në ditë për t’i lënë ushqim dhe ujë, por e mbante të izoluar.
Ai kishte thënë se e kishte bërë këtë për ta mbajtur larg një institucioni, pasi partnerja nuk donte që fëmija të qëndronte në shtëpi.
Autoritetet kanë bërë të ditur se djali nuk kishte probleme të dokumentuara shëndetësore dhe më parë kishte ecur mirë në shkollë.
Babai është arrestuar dhe përballet me akuza të rënda për privim lirie dhe neglizhencë ndaj një të mituri. Edhe partnerja e tij është nën hetim, pasi dyshohet se kishte dijeni për situatën, por nuk e kishte raportuar. Dy fëmijët e tjerë të familjes janë marrë në mbrojtje nga autoritetet.