LVV-ja, e cila ka 57 deputetë në Kuvendin e Kosovës, thekson se aktualisht fokusi i saj është në prioritete të tjera institucionale, përfshirë konstituimin e Kuvendit, votimin e Qeverisë dhe miratimin e disa marrëveshjeve ndërkombëtare, si Plani i Rritjes i Bashkimit Evropian dhe marrëveshjet me Bankën Botërore. Sipas këtij subjekti politik, çështja e zgjedhjes së presidentit do të trajtohet më vonë, por gjithsesi brenda afateve të përcaktuara me Kushtetutë.

Presidentja aktuale, Vjosa Osmani, ka shprehur synimin për të garuar për një mandat të dytë, por nga kabineti i saj nuk janë bërë publike veprime konkrete për sigurimin e përkrahjes së nevojshme politike në Kuvend. Në anën tjetër, kryeministri në detyrë dhe kryetari i Lëvizjes Vetëvendosje, Albin Kurti, nuk ka dhënë garanci për rizgjedhjen e Osmanit, por ka ftuar publikisht partitë opozitare për një marrëveshje, qoftë rreth kandidaturës së saj apo për një kandidat tjetër konsensual.

Politologu Melazim Koci vlerëson se situata aktuale është reflektim i zhvillimeve politike të vitit të kaluar dhe nuk e përjashton mundësinë e një marrëveshjeje ndërmjet Lëvizjes Vetëvendosje dhe Partisë Demokratike të Kosovës për një kandidat konsensual. Megjithatë, ai thekson se LVV-ja ka përjashtuar mundësinë e bashkëqeverisjes me PDK-në, duke e kufizuar bashkëpunimin eventual vetëm në pajtim për një figurë të pranueshme për të dyja palët.

Sipas Kushtetutës së Kosovës, presidenti duhet të zgjidhet jo më vonë se 30 ditë para përfundimit të mandatit aktual. Vjosa Osmani është zgjedhur presidente më 5 prill 2021 dhe mandati i saj përfundon në prill të këtij viti, çka e bën procesin politik për zgjedhjen e presidentit një çështje me rëndësi të veçantë në javët që priten.