23-vjeçarja britanike u qëllua për vdekje në gjoks gjatë një konflikti në shtëpinë e të atit në Teksas. Autoritetet amerikane e cilësuan rastin aksident dhe nuk ngritën akuza.
Nëna e 23-vjeçares britanike Lucy Harrison ka reaguar ashpër pasi autoritetet në SHBA vendosën të mos ngrinin akuza penale për vdekjen e vajzës së saj në Teksas, në vitin 2025. Lucy Harrison, e cila jetonte në Angli me të ëmën, kishte udhëtuar në Shtetet e Bashkuara për të vizituar të atin. Vizita përfundoi tragjikisht brenda banesës së tij.
Sipas të dhënave të hetimit, e reja u qëllua për vdekje në gjoks gjatë një debati të fortë, ku në qendër të përplasjes ishte edhe një diskutim politik për Donald Trumpin. Babai i saj deklaroi se arma ishte shkrepur aksidentalisht, ndërsa ai kishte konsumuar alkool. Autoritetet amerikane e klasifikuan ngjarjen si aksident dhe nuk ngritën akuza ndaj tij.
Në një intervistë për Sky News, nëna e viktimës, Jane Coats, e quajti vendimin “padrejtësi” dhe akuzoi autoritetet për neglizhencë në trajtimin e çështjes. Sipas saj, prova të rëndësishme janë shpërfillur, megjithëse raportet mjekoligjore tregojnë se plumbi goditi një zonë jetike.
Sipas dëshmive, tensionet mes babait dhe vajzës ishin përshkallëzuar pas debatit politik, i cili më pas u kthye në një konflikt të ashpër brenda shtëpisë. Një mik i Lucy Harrison, i cili ndodhej në Teksas në kohën e ngjarjes, deklaroi se situata doli jashtë kontrollit, megjithëse rrethanat e sakta të incidentit mbeten ende të paqarta.
Nëna e 23-vjeçares pretendon se ka kundërthënie në versionin zyrtar të ngjarjes. Ajo thotë se provat nga vendi i incidentit sugjerojnë një distancë të ndryshme të të shtënës nga ajo që ka deklaruar babai. Sipas raportimeve, një eksperte britanike e mjekësisë ligjore e ka cilësuar vdekjen si “vrasje të paligjshme”, në kundërshtim me përfundimin e autoriteteve amerikane.
Jane Coats ka deklaruar se do të vazhdojë përpjekjet për rihapjen e hetimeve, duke insistuar se vdekja e vajzës së saj nuk ishte aksident dhe se çështja nuk është hetuar plotësisht.