Merjem Lumi, e njohur për aktivitetin e saj në predikimin islam dhe praninë e gjatë në rrjetet sociale shqiptare, është rikthyer në vëmendjen e publikut me një rrëfim të sinqertë për sfidat personale dhe shpirtërore që ka përjetuar gjatë viteve të fundit.
Ajo është shfaqur pa shami dhe ka zgjedhur të prezantohet me emrin Maria, emri që, sipas saj, ia kishte vendosur gjyshja para se të përqafonte fenë islame në moshën 13-vjeçare. Pas më shumë se dy dekadash përkushtimi ndaj besimit, studimeve fetare në Damask dhe angazhimit publik në promovimin e vlerave fetare, Maria thotë se ka kaluar periudhën më të vështirë të jetës së saj.
“Nuk jam kthyer e krishterë, por nuk jam më as personi që kam qenë dikur”, shprehet ajo.
Në rrëfimin e saj, Maria tregon se pas largimit nga rrjetet sociale dhe debateve që pasuan, u përball me një krizë të thellë emocionale dhe identitare. Ajo flet hapur për ndjenja zhgënjimi, vetmie, bullizimi dhe përballjeje me pyetje të forta shpirtërore.
Sipas saj, për vite me radhë kishte jetuar me bindjen se po i shërbente Zotit me përkushtim të plotë, por ngjarjet e fundit e shtynë të rishqyrtojë shumë prej bindjeve që e kishin shoqëruar gjatë jetës.
“Merjemja që njerëzit njihnin nuk arriti t’i mbijetojë kësaj periudhe. Ajo që ka mbetur sot janë pyetjet dhe kërkimi për përgjigje”, shprehet ajo.
Aktualisht, Maria thotë se ndodhet në një proces reflektimi dhe kërkimi të një raporti më personal me Zotin, larg etiketimeve dhe paragjykimeve.
Rrëfimi i saj ka ngjallur reagime të shumta në rrjetet sociale, ku opinioni publik është ndarë mes mbështetjes për sinqeritetin e saj dhe kritikave ndaj ndryshimeve që ajo ka bërë në jetën dhe identitetin e saj