Një pjesë e madhe e Europës Perëndimore po përgatitet për valën e parë të fortë të të nxehtit këtë verë, me temperatura që pritet të jenë deri në 10 gradë Celsius mbi mesataren sezonale.
Sipas parashikimeve meteorologjike, në Portugali, Spanjë, Francë dhe Mbretërinë e Bashkuar temperaturat do të kalojnë 30°C gjatë fundjavës dhe në fillim të javës së ardhshme.
Në Paris dhe Londër priten deri në 32°C, në jugperëndim të Francës deri në 35°C, ndërsa në disa rajone të Spanjës temperaturat mund të arrijnë deri në 38°C.
Shërbimi meteorologjik francez Météo-France paralajmëroi se në disa zona mund të thyhen rekordet historike të muajit maj.
Sipas meteorologëve, vala e të nxehtit po shkaktohet nga fenomeni i njohur si “kupolë nxehtësie”, ku ajri i nxehtë që vjen nga Afrika e Veriut mbetet i bllokuar nga një sistem i fortë presioni atmosferik.
Rajone si Bretanja në Francë pritet të përjetojnë temperatura shumë më të larta se normalja për këtë periudhë të vitit.
Ekspertët theksojnë se ndryshimet klimatike po bëjnë që fenomene të tilla ekstreme të ndodhin më shpesh, më herët dhe me intensitet më të lartë.
Në Mbretërinë e Bashkuar, shërbimi meteorologjik Met Office ka lëshuar paralajmërime për rrezik shëndetësor nga temperaturat e larta.
Në disa zona temperaturat mund të arrijnë deri në 33°C, duke iu afruar rekordit historik të muajit maj prej 32.8°C, të regjistruar në vitin 1944.
Ndërkohë, në Spanjë autoritetet raportuan edhe një ngjarje tragjike, ku një vajzë dyvjeçare humbi jetën pasi u la aksidentalisht për disa orë brenda një makine në rajonin e Galicias.
Shërbimi meteorologjik spanjoll AEMET paralajmëroi se vala e të nxehtit do të vazhdojë edhe gjatë javës së ardhshme, me temperatura tipike të muajve korrik dhe gusht.
Ekspertët paralajmërojnë se Europa, kontinenti që po ngrohet më shpejt në botë, do të përballet gjithnjë e më shpesh me episode ekstreme të të nxehtit në vitet e ardhshme.