Kryetari i Partisë Demokratike, Sali Berisha gjatë mbledhjes së Grupit Parlamentar paralajmëroi se ditën e nesërme kryetari i Gjykatës së Lartë, Sokol Sadushi, do të marrë një vendim që do tëp rekë edhe kryebashkiakun e Tiranës, Erion Veliaj, i cili qëndron në paraburgim prej më shumë se një viti, pa një vendim të prerë ndaj tij.
Sipas Berishës, ky vendim mund të rrezikojë sigurinë e vendit dhe të rajonit, duke përfshirë edhe persona të përfshirë në krim të organizuar. Ai theksoi se përfituesit e mundshëm nga kjo ndryshim procedure do të jenë jo vetëm Veliaj, por edhe dhjetëra drejtues të grupeve kriminale.
“Nesër Sadushi, që kërcënon absolutisht sigurinë e Shqipërisë dhe vendeve të rajonit, del me vendimin që ata që janë në paraburgim pa vendim të prerë, të dalin. Ky është vendimi Veliaj.
Por nga vendimi Veliaj përfitojnë me dhjetëra bosë të drogës, krerë të organizatave kriminale. Por kjo është gjetur rruga e paqes midis klaneve mafioze. Por keni parë që studiot e kontrolluara nga Rama nuk thonë një fjalë të vetme. Nuk shqipërojnë një fjalë të vetme, nuk bëjnë një transparencë të vetme për të gjitha këto”, tha ai.
Vendimi i Sokol Sadushit ka nisur procedurën për ndryshimin e praktikës së njësuar të Gjykatës së Lartë për masat e sigurisë, që zbatohet që nga vendimi unifikues nr. 7, datë 14 tetor 2011. Nisma ka për qëllim kufizimin e dhënies pa kriter të masës “arrest me burg”, duke ndryshuar procedurat e deritanishme të vendosura për më shumë se një dekadë e gjysmë.
Ky zhvillim shënon një ndryshim të rëndësishëm në praktikat gjyqësore dhe pritet të ketë pasoja të drejtpërdrejta për personat që janë aktualisht në paraburgim pa vendim të prerë.