Ministri i Mbrojtjes i Gjermanisë, Boris Pistorius, ka deklaruar se burrat në moshë për shërbim ushtarak nuk do të kenë nevojë të raportojnë apo të marrin leje për qëndrime të gjata jashtë vendit.
Deklarata e tij vjen pas një polemike të shkaktuar nga pasojat e mundshme të një ligji të ri që rikthen në parim shërbimin ushtarak në Gjermani.
Ligji për Modernizimin e Shërbimit Ushtarak, që hyri në fuqi më 1 janar, synon të forcojë mbrojtjen e vendit pas kërcënimeve nga Rusia në vijim të pushtimit të plotë të Ukrainës.
Në një deklaratë për BBC në fillim të prillit, një zëdhënës i ministrisë së Mbrojtjes konfirmoi se meshkujt nga mosha 17 vjeç e lart duhet të merrnin miratim paraprak për qëndrime jashtë vendit që zgjasin më shumë se tre muaj.
Kjo kërkesë kishte kaluar pothuajse pa u vënë re deri javën e kaluar, kur u raportua nga një gazetë gjermane. Sipas informacioneve, ajo nuk ishte zbatuar në praktikë.
Tashmë, Pistorius, nga Partia Socialdemokrate, ka bërë të ditur se do të vendoset një përjashtim nga kjo rregull. “Qoftë 17 apo 45 vjeç, apo në çdo moshë ndërmjet – të gjithë janë të lirë të udhëtojnë dhe aktualisht nuk kanë nevojë për leje,” deklaroi ai për agjencinë gjermane të lajmeve DPA.
Ai shtoi gjithashtu se as qëndrimet e gjata jashtë vendit nuk do të kenë nevojë të raportohen. “Gjatë kësaj periudhe paqeje, nuk do të ketë procedura për leje. Po e pezullojmë këtë kërkesë për sa kohë që shërbimi ushtarak mbetet vullnetar,” theksoi Pistorius.
Në të njëjtën kohë, ai njoftoi se procedura të posaçme do të vendosen në rast krize, duke mbrojtur rregulloren si një “masë parandaluese”.
Ligji i ri rikthen në parim rekrutimin e detyrueshëm, por ai do të zbatohet vetëm nëse nuk ka mjaftueshëm vullnetarë për ushtrinë.
Kancelari gjerman Friedrich Merz ka deklaruar se synon ndërtimin e ushtrisë konvencionale më të fortë në Evropë.
Që nga janari i këtij viti, të gjithë 18-vjeçarët në Gjermani marrin një pyetësor për të shprehur interesin dhe gatishmërinë për t’iu bashkuar forcave të armatosura. Plotësimi i tij është i detyrueshëm për meshkujt dhe vullnetar për femrat.
Nga korriku i vitit 2027, të gjithë meshkujt 18-vjeçarë do t’i nënshtrohen gjithashtu një kontrolli mjekësor për të vlerësuar aftësinë e tyre për shërbim ushtarak.