Irani ka reaguar ashpër ndaj deklaratave të Presidentit amerikan Donald Trump për Papa Leo XIV, duke i cilësuar ato si fyese dhe të papranueshme.
Presidenti iranian Masoud Pezeshkian, në një mesazh publik, dënoi komentet e Trump, duke theksuar se sulmet ndaj figurave fetare bien ndesh me vlerat universale.
“E dënoj fyerjen ndaj Shkëlqesisë Suaj në emër të kombit të madh të Iranit dhe deklaroj se përdhosja e Jezusit, profetit të paqes dhe vëllazërisë, nuk është e pranueshme për asnjë person të lirë”, u shpreh ai, duke shtuar: “Ju uroj lavdi nga Allahu”.
Në të njëjtën linjë, Mehdi Tabatabaei, zëvendës për komunikimet në presidencën iraniane, e ashpërsoi retorikën duke e krahasuar situatën me një “vrasje karakteri”.
“Kur udhëheqësi i madh fetar i botës islame vritet me një guxim kaq të paturp dhe perëndimorët shikojnë në heshtje, nuk është çudi që ata do të përdornin vrasjen e karakterit të udhëheqësit të madh të të krishterëve të botës, Shenjtërisë së Tij Papa Leo”, deklaroi ai.
Reagimet nga Teherani vijnë pas komenteve të bëra një ditë më parë nga Donald Trump, i cili u shpreh se “nuk ishte një tifoz i Papa Leos”, duke kritikuar qëndrimin e tij ndaj konfliktit me Iranin dhe duke shtuar se Papa është “i tmerrshëm për politikën e jashtme”.
Nga ana e tij, Papa Leo XIV i është përgjigjur kritikave me tone të qarta, duke theksuar misionin e tij fetar.
“Nuk kam frikë nga administrata Trump apo nga të folurit me zë të lartë për mesazhin e Ungjillit, të cilin besoj se jam këtu për të bërë”, deklaroi ai para gazetarëve.