Prandaj, Jordan Bardella, Mélenchon, Edouard Philippe, Raphaël Glucksmann apo kushdo që ëndërron Élysée-n: duhet të bëjnë pak përpjekje…
Çfarë mund të blesh me 25, 420 euro? Nuk po flasim për ditët e sotme sigurisht, aq para sot janë afërsisht faturat javore të supermarketit nëse shton edhe ca konserva ekstra dhe dy-tri pako letër higjienike për bunkerin anti-hantavirus.
Por në vitin 2024, me aq para mund të bëheshe pronar i një relike të vërtetë romantiko-politike franceze: skuterit me të cilin François Hollande dilte fshehurazi për takime dashurie nëpër Paris.
Një Piaggio MP3 125 gri, mjeti historik mbi të cilin ish-presidenti francez shtrydhte dinjitetin presidencial mes trafikut parisien për të takuar aktoren Julie Gayet, atëherë të dashur dhe sot bashkëshorten e tij.
Në vitin 2015 kjo histori shpërtheu si finale telenovele në prime time. Revista Closer publikoi foton ikonike të Hollande me helmetë, dukej më shumë si shpërndarës picash sesa president i Francës, ndërkohë që ende ishte në lidhje me gazetaren Valérie Trierweiler.
Pastaj erdhi detaji që elektrizoi Francën: agjenti i sigurisë që, në mëngjes herët, u sillte të dashuruarve një qese me kroasanë. Më vonë u tha se brenda kishte dokumente shtetërore. Po sigurisht. Sepse francezët njihen për zakonin e çuditshëm për të transportuar dosje sekrete në qese furre buke.
Sot, ndërkohë, duket sikur edhe skandalet presidenciale kanë humbur sharmin. Një libër i ri; “Një çift (pothuajse) perfekt” nga gazetari Florian Tardif, pretendon se Brigitte Macron e shtyu ose ndoshta “e qëlloi me dashuri”, Emmanuel Macronin në fytyrë para se të zbrisnin nga avioni në Vietnam, pasi kishte parë një mesazh në telefonin e tij nga aktorja iraniano-franceze Golshifteh Farahani.
Sipas autorit, Macron kishte një “marrëdhënie platonike” me aktoren. Që në politikë zakonisht është mënyra elegante për të thënë: “mesazhet po bëheshin pak më kreative seç duhej”.
Por ndryshe nga koha e Hollande, publiku nuk duket fort i interesuar. Askush nuk po pret episodin tjetër me kokoshka në dorë, edhe pse, duke qenë Francë, ndoshta më shumë me escargots dhe një gotë Bordeaux.
Ndoshta problemi është se Macron nuk ka romantizmin absurd të Hollande. Hollande ishte presidenti që dilte fshehurazi me skuter dhe kroasanë. Macron, nga ana tjetër, duket si ai tipi hiperaktiv që bën turne në Afrikë, qorton gazetarët, vrapon me maratonistë profesionistë dhe ndoshta stërvitet në sprint vetëm në rast se Brigitte i kontrollon prapë telefonin.
Prandaj, Jordan Bardella, Mélenchon, Edouard Philippe, Raphaël Glucksmann apo kushdo që ëndërron Élysée-n: duhet të bëjnë pak përpjekje.
Organizoni një aferë dinjitoze, sillni një skuter, ndoshta edhe ndonjë qese misterioze me kroasanë. Politika franceze ka nevojë urgjente të rikthejë pak seks appeal-in e saj institucional.