Beteja për audiencën mes dy formateve televizive, “Big Brother VIP” dhe “Ferma VIP”, ka arritur kulmin mbrëmjen e sotme.
Siç ishte paralajmëruar nga rrjeti, produksioni i BBVA kishte organizuar dasmën e shumëpritur mes Mateos dhe Brikenës, një lëvizje strategjike e qartë për të mbajtur vëmendjen maksimale të publikut në të njëjtin orar me spektaklin rival.
Megjithatë, pamjet e kapura nga shikueshmëria live në kanalet zyrtare në YouTube kanë treguar një rezultat mjaft befasues.
Në momentin kulminant të dasmës në shtëpinë e BBVA, pikërisht gjatë puthjes së çiftit, transmetimi numëronte rreth 220 mijë shikues në kohë reale.
Nga ana tjetër, në një koincidencë mjaft ironike, Arbana Osmani kishte kaluar në hapësirë publicitare në “Ferma VIP” vetëm pak momente para kësaj ngjarjeje.
Çuditërisht, edhe pse me transmetim të ndërprerë, “Ferma VIP” ia ka dalë të shënojë një audiencë më të lartë, duke mbledhur mbi 241 mijë shikues live.
Ky detaj nuk ka kaluar pa u vënë re nga ndjekësit e vëmendshëm, të cilët kanë shpërndarë menjëherë pamjet krahasuese.
