Pas publikimit të rastit nga emisioni investigativ “Piranjat” ku drejtori i një shkolle në Gjakovë ngacmon seksualisht një nxënëse 13-vjeçare, ka reaguar Ministria e Arsimit dhe Shkencës së Kosovës, duke theksuar se pas publikimit të skandalit arsimtari është pezulluar nga detyra.
Ministria e Arsimit dhe Shkencës së Kosovës thotë gjithashtu, pret nga të gjitha institucionet përgjegjëse që rasti të trajtohet me prioritet, profesionalizëm dhe në përputhje të plotë me legjislacionin në fuqi deri në një dënim meritor të autorit.
Reagimi:
Ministria e Arsimit dhe Shkencës (MASh) shpreh shqetësimin e thellë lidhur me rastin e raportuar në komunën e Gjakovës për ngacmim seksual nga ana e drejtorit të një institucioni arsimor.
Menjëherë pas marrjes së informatave për rastin, Inspektorati i Arsimit ka kontaktuar Policinë e Kosovës dhe Drejtorinë Komunale të Arsimit në Gjakovë për të siguruar informacionet relevante lidhur me veprimet institucionale të ndërmarra.
Sipas informatave të pranuara nga autoritetet kompetente komunale, Komisioni disiplinor ka marrë vendim për pezullimin e drejtorit nga marrëdhënia e punës.
Çdo formë e ngacmimit seksual dhe dhunës dhe abuzimit e keqpërdorimit të pozitës zyrtare në institucionet arsimore është i papranueshëm dhe i dënueshëm.
Institucionet arsimore duhet të jenë mjedise të sigurta dhe mbrojtëse për çdo fëmijë dhe nxënës, ndërsa çdo veprim i dyshuar që cenon integritetin dhe dinjitetin e të miturve duhet të trajtohet me seriozitet më të lartë nga organet kompetente.
MASh pret nga të gjitha institucionet përgjegjëse që rasti të trajtohet me prioritet, profesionalizëm dhe në përputhje të plotë me legjislacionin në fuqi deri në një dënim meritor, duke garantuar mbrojtjen e integritetit dhe dinjitetit të secilit nxënës në institucionet tona arsimore dhe besimin në institucionet publike.
Ministria do të vazhdojë të përcjellë zhvillimet lidhur me këtë rast dhe do të ofrojë mbështetjen e nevojshme institucionale në kuadër të kompetencave të saj.