Qyteti i Heraklion, në ishullin e Kretë, po përballet me një situatë të pazakontë dhe alarmante, pasi është mbuluar nga nivele jashtëzakonisht të larta të pluhurit afrikan, duke krijuar shqetësim të madh për banorët dhe autoritetet lokale.
Sipas të dhënave të publikuara nga Observatori Kombëtar i Athinës përmes platformës Meteo.gr, përqendrimi i grimcave të pezulluara në ajër ka arritur deri në 1000 mikrogramë për metër kub.
Këto nivele konsiderohen tejet të rrezikshme dhe ndikojnë drejtpërdrejt në cilësinë e ajrit, duke rritur ndjeshëm rrezikun për probleme shëndetësore, veçanërisht për personat me sëmundje të frymëmarrjes, të moshuarit dhe fëmijët.
Pamjet nga qyteti tregojnë një atmosferë të dendur dhe të turbullt, ku dukshmëria është reduktuar në minimum. Nga kulla e kontrollit në Aeroporti Nikos Kazantzakis raportohet se dukshmëria ka rënë në vetëm 600 metra, krahasuar me rreth 10 kilometra në kushte normale.
Kjo situatë ka shkaktuar probleme serioze në trafikun ajror, duke detyruar autoritetet të ndryshojnë planet e fluturimeve. Sipas mediave lokale, aktualisht po realizohen vetëm ngritje avionësh, ndërsa fluturimet që duhet të ulen në Heraklion janë devijuar drejt aeroporteve të tjera të ishullit.
Ndërkohë, meteorologët paralajmërojnë se fenomeni nuk do të jetë afatshkurtër. Sipas parashikimeve, kjo valë e pluhurit afrikan pritet të zgjasë deri të enjten, më 2 prill, me mundësi për një tjetër valë që mund të godasë sërish rajonin në ditët në vijim.
Autoritetet shëndetësore kanë bërë thirrje urgjente për qytetarët që të tregojnë kujdes maksimal. Rekomandohet shmangia e daljeve të panevojshme, përdorimi i maskave mbrojtëse dhe qëndrimi në ambiente të mbyllura, sidomos për grupet më të rrezikuara. Situata mbetet në monitorim të vazhdueshëm, ndërsa ekspertët theksojnë se këto fenomene janë gjithnjë e më të shpeshta për shkak të ndryshimeve klimatike.