Protestat kundër fushatës së bombardimeve SHBA-Izrael ndaj Iranit janë përhapur në disa vende të botës, duke shkaktuar dhunë në Pakistan dhe Irak, ndërsa në disa qytete evropiane pati festime nga komunitetet iraniane në mërgim.
Sipas raportimit të Reuters, të paktën 23 protestues u vranë në Pakistan, 10 në Karachi, pranë konsullatës amerikane, 11 në Skardu dhe 2 në Islamabad.
Në Karachi, rojet e sigurisë së konsullatës amerikane hapën zjarr pasi protestuesit thyen perimetrin e jashtëm të sigurisë. Autoritetet lokale thanë se 34 persona u plagosën, ndërsa qeveria provinciale e Sindh urdhëroi hetim.
Në qytetin verior Skardu, protestuesit i vunë flakën një zyre të OKB, sipas zyrtarëve lokalë.
Në Islamabad, policia përdori gaz lotsjellës dhe plumba për të shpërndarë mijëra persona që tentuan të marshonin drejt zonës diplomatike.
Në Irak, forcat e sigurisë hodhën gaz lotsjellës dhe granata trullosëse për të shpërndarë qindra protestues pro-iranianë të mbledhur pranë ambasadës amerikane në Bagdad.
Ndërkohë, në qytete me komunitete të mëdha iraniane në mërgim, pati festime pas raportimeve për vdekjen e liderit suprem iranian, Ali Khamenei.
Në Paris, mijëra persona dolën në rrugë duke valëvitur flamuj të monarkisë para-revolucionare iraniane, si dhe flamuj të Izraelit, SHBA-së dhe Francës. Festime u raportuan edhe në Lisbonë.
Pakistani dhe Iraku, dy vende me popullsi të madhe shiite pas Iranit, u kthyen në epiqendra të trazirave më të rënda. Autoritetet u bënë thirrje qytetarëve për qetësi, ndërsa situata mbetet e tensionuar.
Zhvillimet vijnë në një moment përshkallëzimi të fortë në Lindjen e Mesme, me pasoja që tashmë po ndihen në disa kontinente.