Garda Revolucionare Iraniane (IRGC) deklaroi se gjatë 24 orëve të fundit, 26 anije kanë kaluar nëpër Ngushticën e Hormuzit, përfshirë cisterna nafte, anije kontejnerësh dhe mjete të tjera tregtare detare.
Sipas një deklarate të IRGC-së, kalimi i anijeve është realizuar “me koordinimin dhe sigurinë e ofruar nga Marina e Gardës Revolucionare”.
Më herët gjatë ditës u raportua se të paktën tre cisterna, që transportonin rreth tetë milionë fuçi naftë të papërpunuar, kishin kaluar korridorin strategjik detar, pavarësisht tensioneve dhe kufizimeve të vendosura nga Irani.
Autoritetet iraniane kanë theksuar pretendimin se çdo lëvizje në Ngushticën e Hormuzit duhet të kryhet me koordinim paraprak me Teheranin, ndërsa qeveria iraniane synon të vendosë një regjim taksimi për anijet që përdorin këtë rrugë kyçe të tregtisë globale të energjisë.
“26 anije kanë kaluar Ngushticën e Hormuzit gjatë 24 orëve të fundit. Kalimi është realizuar me koordinimin dhe sigurinë e ofruar nga Marina e IRGC-së. Kalimi në ngushticë lejohet vetëm me koordinim paraprak me Iranin”, thonë autoritetet iraniane lidhur me kontrollin në Hormuz.