Një deklaratë e fortë dhe e papritur po bën xhiron e rrjetit orët e fundit, duke vënë në qendër të vëmendjes aktorin e njohur Laert Vasili.
Ka qenë Rene Refo, vajza e aktores së mirënjohur Julia Ilirjani, ajo që ka zgjedhur finalen e sezonit të podcastit të saj, “Zero fucks given”, për të ndarë me ndjekësit një prapaskenë mjaft të rëndë.
Në materialin filmik përmbledhës, Rene bëri një skanim të të gjithë eksperiencës, duke dhënë nga një vlerësim të shkurtër për çdo personazh që kishte ulur përballë përgjatë muajve.
Megjithatë, situata ka ndryshuar tërësisht kurs kur ajo u ndal tek emri i aktorit Laert Vasili.
Rene sqaroi fillimisht se përpara se ta ftonte në emision, gëzonte një konsideratë të lartë për të si artist, ishte adhuruese e punës së tij dhe, mbi të gjitha, e vlerësonte për shkak të historisë së gjatë të bashkëpunimeve që ai ka pasur në teatër me nënën e saj.
Por, gjërat kanë degraduar menjëherë pas realizimit të intervistës.
Sipas rrëfimit të saj, Laerti i ka dërguar një video në telefon, përmbajtja e të cilit ka qenë mjaftueshëm shqetësuese sa për të ndërprerë çdo lloj komunikimi në të ardhmen.
Ndonëse zgjodhi të mos hynte në hollësi të mëtutjeshme, ajo la të nënkuptohej hapur natyra e mesazhit përmes fjalisë: “e kuptoni ju per cfare video behet fjale”.
Më tej, autorja e podcastit zbuloi se ky incident ka pasur ndikim edhe në jetën e saj sociale, duke treguar se ka refuzuar në mënyrë të përsëritur ftesat për të marrë pjesë në organizime apo evente të ndryshme publike, sapo është vënë në dijeni se në të njëjtin ambient do të ishte i pranishëm edhe aktori, me qëllimin e vetëm për të shmangur totalisht çdo kontakt apo ballafaqim me të.