Lajm i keq për ata që duan të punojnë në Gjermani: Dyfish më pak viza pune
Gjermania po shtrëngon rregullat: Më pak viza pune për qytetarët e Ballkanit Perëndimor
Gjermania po përgatit ndryshime të rëndësishme në politikën e saj për punësimin e punëtorëve nga Ballkani Perëndimor, të cilat mund të ndikojnë drejtpërdrejt edhe te qytetarët e Maqedonisë së Veriut që planifikojnë të punojnë në këtë vend.
Sipas njoftimeve, koalicioni i ri qeverisës në Gjermani po shqyrton mundësinë që kuota vjetore e vizave të punës në kuadër të të ashtuquajturës “Rregullorja për Ballkanin Perëndimor” të ulet nga 50.000 në 25.000 persona.
Kjo rregullore prej vitesh ka qenë një nga mënyrat më të lehta për punësim të ligjshëm në Gjermani për shtetasit e Maqedonisë së Veriut, Shqipërisë, Kosovës, Bosnje dhe Hercegovinës, Serbisë dhe Malit të Zi. Për të marrë vizë pune nevojitet një ofertë pune nga një punëdhënës gjerman dhe miratimi i Agjencisë Federale Gjermane të Punës.
Autoritetet gjermane si arsye për këto ndryshime të mundshme përmendin rritjen e papunësisë dhe nevojën për kontroll më të rreptë të migracionit të punës. Nga ana tjetër, një pjesë e punëdhënësve gjermanë paralajmërojnë se vendi vazhdon të përballet me mungesë të madhe të fuqisë punëtore, veçanërisht në sektorët e ndërtimtarisë, hotelerisë, kujdesit shëndetësor dhe shërbimeve.
Nëse këto ndryshime miratohen, kandidatët e interesuar nga Maqedonia e Veriut do të përballen me konkurrencë dukshëm më të madhe për vizat e punës, pritje më të gjata dhe më pak termine të disponueshme në përfaqësitë diplomatike dhe konsullore gjermane.
Për momentin, këto ndryshime ende nuk kanë hyrë në fuqi. Për zbatimin e tyre nevojiten ndryshime ligjore, ndërsa qeveria gjermane ende nuk ka njoftuar se kur mund të miratohen. Deri atëherë, vazhdon të mbetet në fuqi kuota aktuale prej 50.000 lejesh në vit.